談補習｜致DSE考生的肺腑之言｜BJMF

補習唔係一樣壞事，但係個人覺得長期補好多習嘅人係戇尻。有免費網上資源、有免費日校教育，你全部都冇善用，跟住攞舊錢去補習？所以建議大家如果長期依賴補習嘅話，就要反省下自己讀書方式係咪有問題。以下分享我揀補習嘅幾個原則：

數理科目：唔補

個人認為唔應該補習係因為呢啲數理科有標準答案，而且喺網上面都有好多Past Paper。只要你係有心溫，我就唔信你由CE做到DSE都理解唔到個Marking Scheme。利申返，我數底唔算太差但係都唔係好勁，DSE攞Lv5，中規中矩。除非你係基礎太差，完全理解唔到個邏輯，需要人解釋俾你聽，否則我都覺得可以自己搞掂。不過當然，如果你有閒錢，補習的確能夠為你慳啲時間。

Dum波鐘嘅：唔補

我嗰陣中六先開始補習，就係覺得市面上好多常規課程都會同雞精班嘅教學內容重疊咗。聽講仲會有補習老師係會特登教唔晒嗰堂嘅內容，迫學生加錢再報，浪費金錢之餘仲浪費時間。特別推薦網上自己睇片嘅教學模式，有得自己決定上堂時間，更確保唔會焗住俾多幾堂先學得晒啲嘢。

淨係補技巧

個人覺得補習去打好基礎都幾嘥錢，尤其是語文科目，屌你自己睇多幾本書/幾套劇仲有用過補習啦。尤其背返嚟嘅字詞根本好難正確咁用得返出嚟，唔明點解仲會有人樂此不疲咁吞Vocab List/成語表。我嗰陣只會揀啲能夠短時間內令我了解考評局要求嘅補習課程，而呢啲技巧必須要係自己領悟唔到。

結語

以上評論可能得罪好多人，不過我衷心相信學習知識應該盡量靠自己。補習應該係你要玩贏考評局呢個遊戲嘅工具。但係想真正成為一個知識淵博嘅人，就先要學識「點樣學習」，而呢個能力必須靠自己不斷練習同進步先能夠擁有。

希望各位上到大學明白到追求知識嘅快樂，亦有返大學生嘅風骨，擺脫以往嘅填鴨式教育，蛻變成為真正嘅知識分子。共勉之。